گوادر، 26 اکتوبر 2024
ڈائریکٹر جنرل گوادر ڈیولپمنٹ اتھارٹی شفقت انور شاہوانی نے ہفتے کے روز جی ڈی اے کے اولڈ ٹاؤن بحالی منصوبے کے تحت جاری مختلف ترقیاتی کاموں کا دورہ کیا اور تعمیراتی سرگرمیوں کا تفصیلی جائزہ لیا۔ ڈائریکٹر جنرل نے ملا فاضل چوک، گلگ، شاہین چوک، اور قدیم ثقافتی ورثہ کی سائٹس، ٹیلیگراف آفس، چارپادگو، اور عمانی فورٹ کا دورہ کیا۔ انہوں نے زیرِ تعمیر منصوبوں کا باریکی سے معائنہ کرتے ہوئے کہا کہ منصوبوں میں کسی بھی قسم کی تاخیر برداشت نہیں کی جائے گی۔ افسران اور کنٹریکٹرز کو ہدایت کی کہ کام کی معیار اور بروقت تکمیل کو یقینی بنائیں۔ انہوں نے کہا کہ ملافاضل چوک پر سیوریج لائن کا دیرینہ مسئلہ اس منصوبے کی تکمیل سے مستقل طور پر حل ہو جائے گا۔ ڈائریکٹر جنرل نے انجمن تاجران کے نمائندوں اور مقامی مکینوں سے ملاقاتیں بھی کیں، ان کے مسائل سنے، اور ترقیاتی منصوبوں پر ان سے تبادلہ خیال کیا۔ انہوں نے کہا کہ عوامی شمولیت اور ان کے مسائل کا حل ترقیاتی منصوبوں کی کامیابی کے لیے بنیادی اہمیت رکھتا ہے۔ اس موقع پر جی ڈی اے کے افسران بھی ڈائریکٹر جنرل کے ہمراہ موجود تھے